မယ်လ ဒုက္ခသည် စခန်း၌ အတုဟုယူဆရသော ၅၀၀၀ တန်များ ဖမ်းမိ
အတုဟု ယူဆရသော ၅၀၀၀ ကျပ် တန် ငွေ စက္ကူများ(ဓာတ်ပုံ - ဧရာဝတီ)
ထိုင်း-မြန်မာ နယ်စပ် မယ်လ ဒုက္ခသည် စခန်း၌ မြန်မာနိုင်ငံသား တဦးထံတွင် ကျပ်ငွေ သိန်း ၃၀ ခန့်ရှိ အတုဟု ယူဆ ရသော ၅၀၀၀ တန် ငွေစက္ကူများကို စခန်း အာဏာပိုင်များက ယမန်နေ့က ဖမ်းဆီး လိုက်သည်။
“မြ၀တီကလာတဲ့ စောဖားဝါးကို မနေ့ညနေက ဖမ်းလိုက်တာ။ မြန်မာငွေ အတု သိန်း ၃၀ ကို စခန်းဈေးထဲမှာရှိတဲ့ ငွေလဲ တဲ့ဆိုင်မှာလာလဲတာ၊ အတုတွေ ဖြစ်နေတဲ့အတွက် သူ့ကို ဖမ်းဆီးစစ်ဆေးပြီး ထိုင်း အာဏာပိုင်တွေဆီ လွှဲပြောင်းပေး လိုက်တယ်”ဟု မယ်လ ဒုက္ခသည် စခန်း ဥက္ကဌ စောထွန်းထွန်းက ဧရာဝတီသို့ ပြောသည်။
အတုဟု ယူဆရသော ၅၀၀၀ ကျပ် တန် ငွေ စက္ကူများနှင့် အတူ ဖမ်းဆီးခံထားရသည့် စောဖားဝါး(ဓာတ်ပုံ - ဧရာဝတီ)
မယ်လ ဒုက္ခသည် စခန်းတွင် စခန်း အုပ်ချုပ်ရေး ကော်မတီ အနေနှင့် သာမန်လူမှုရေး ပြဿနာများကို ဖြေရှင်းပေးလေ့ ရှိသော်လည်း လူသတ်မှု၊ မဒိန်းမှု၊ မူးယစ်ဆေးဝါးအမှု အပါအ၀င် ရာဇ၀တ်မှုဆိုင်ရာ များကို ထိုင်း အာဏာပိုင်များထံ လွှဲပြောင်းပေးရကြောင်း ၎င်းက ဆိုသည်။ အဖမ်းခံရသည့်သူ စောဖားဝါးက ၎င်း၏ မြန်မာပြည်တွင်းမှ မော်တော်ဆိုင်ကယ် ၂ စီး ရောင်းရသည့် ငွေများကို ထိုင်း ဘတ်ငွေများနှင့် လာရောက်လဲလှယ်ခြင်းဖြစ်ပြီး ငွေအတုများဖြစ်ကြောင်း မသိရှိဟု ထိုင်း အာဏာပိုင်များထံ ထွက်ဆို ထားကြောင်း သိရသည်။ ၎င်းကို မည်သည့် နေရာတွင် ထိန်းသိမ်းထားသည်ကို မသိရှိရသေးပေ။
စခန်း တာဝန်ရှိသူများ ပြောပြချက်အရ အဖမ်းခံရသူနှင့် အတူလိုက်ပါလာသည့် အမျိုးသမီး ၄ ဦးမှာလည်း မဲဆောက်မြို့ သို့ ရောက်ရှိနေကြောင်း သိရသည်။
ယခင်က ဒုက္ခသည် စခန်းထဲတွင် မြန်မာ ကျပ်ငွေ အတုများ သန်းနှင့်ချီ၍ ဖမ်းဆီးမိခဲ့ကြောင်း၊ ထိုင်း-မြန်မာ နယ်စပ်တွင် ကျပ်ငွေ အတုနှင့် ပတ်သက်သည့် သတင်းများ မကြာခဏ ပေါ်ပေါက်လေ့ ရှိကြောင်း ငွေလဲလှယ်မှု ပြုလုပ်သူများက ပြောသည်။
အတုဟု ယူဆရသော ၅၀၀၀ ကျပ် တန် ငွေ စက္ကူများနှင့် အတူ ဖမ်းဆီးခံထားရသည့် စောဖားဝါး(ဓာတ်ပုံ - ဧရာဝတီ)
“မဲဆောက်မှာကတော့ မြန်မာ ကျပ်ငွေ ၅၀၀၀ တန်တွေ မရှိသလောက်ဘဲ အတုတွေ ၀င်နေတာတော့ ကြားတယ်၊ မတွေ့ သေးဘူး မြန်မာတွေကလည်း ဒီ ၅၀၀၀ တန်ကို မလိုချင်ကြဘူး၊ ၁၀၀၀ တန်တွေကိုပဲ ယူကြတယ်”ဟု ထိုင်း-မြန်မာ နယ်စပ် မဲဆောက်မြို့ဈေးထဲတွင် တရားဝင် ငွေလဲလှယ်နေသည့် ဆိုင် ပိုင်ရှင်တဦး က ပြောသည်။
မယ်လ ဒုက္ခသည် စခန်းတွင် တရားမ၀င် ငွေလွှဲဆိုင်များ အများအပြားရှိပြီး တတိယ နိုင်ငံ အသီးသီးသို့ရောက်ရှိနေကြ သူများက စခန်းတွင် ကျန်ရှိနေသည့် ဆွေမျိုးသားချင်းများထံ ငွေပို့ပေးရာမှ အစပြု၍ ငွေလဲဆိုင်များဖြစ်ပေါ်လာခြင်း ဖြစ် ကြောင်း စခန်းအတွင်း နေထိုင်သူ တဦးက ရှင်းပြသည်။
“ဒီမတိုင်ခင်က ဒုက္ခသည်တွေမှာ လဲစရာ ဘာငွေမှမရှိဘူး၊ အခုတော့ မယ်လစခန်း ဈေးကြီးက မဲဆောက်ဈေးနဲ့ နင်လား ငါလားပဲ”ဟု ၎င်းက ဆိုသည်။
စခန်း အတွင်းရှိ ငွေလဲလှယ်သည့် ဆိုင်များမှာ နိုင်ငံတကာမှ ပေးပို့လာသော ငွေများကို အခကြေးငွေယူကာ ၀န်ဆောင် မှုများ ပေးသကဲ့သို့ မြန်မာနိုင်ငံ အရပ်ရပ်သို့လည်း ငွေလွှဲ ငွေပို့ လုပ်ငန်းများ ဆောင်ရွက် နေကြောင်း သိရသည်။
မယ်လ ဒုက္ခသည် စခန်းတွင် လူဦးရေ ၄၀၀၀၀ ခန့် နေထိုင်လျက်ရှိပြီး ထိုင်း-မြန်မာ နယ်စပ် တလျှောက်တွင် ဒုက္ခသည် စခန်း ၉ ခု ရှိသည်။ ထိုဒုက္ခသည် စခန်းများရှိ ဒုက္ခသည် များသည် ၁၉၈၃ ခုမှ စတင်၍ စစ်အစိုးရ တပ်များ၏ ထိုးစစ် ဆင်မှုကြောင့် ထိုင်းနိုင်ငံသို့ ထွက်ပြေး လာကြသူများ ဖြစ်သည်။
သတင်းရင်းမြစ် _ ဧရာဝတီ
0 件のコメント:
コメントを投稿