ကွတ်ခိုင်မြို့နယ်တွင် တိုင်းရင်းသားတပ်ပေါင်းစုနှင့် မြန်မာတပ်ဖွဲ့ တိုက်ပွဲဖြစ်ပွား

ကွတ်ခိုင်မြို့နယ်တွင် တိုင်းရင်းသားတပ်ပေါင်းစုနှင့် မြန်မာတပ်ဖွဲ့ တိုက်ပွဲဖြစ်ပွား

၂ ရက်၊ အောက်တိုဘာလ၊ ၂ဝ၁၂ ခုနှစ်။

၂ဝ၁၂ ခုနှစ်၊ အောက်တိုဘာလ၊ ၁ ရက်နေ့၊ နံက် ၈း၁၅ နာရီခန့်တွင် တအာင်းဒေသ ကွတ်ခိုင်မြို့နယ် ရှိ ပိန်ပွန်၊ မန်ဆိန်၊ ပန်နျှိူးရွာ အနီးတို့တွင် T.N.L.A တပ်ရင်း-၁၁၂၊ နှင့် K.I.A တပ်ရင်း-၈ မှ တိုင်းရင်းသား ပူးတွဲတပ်ဖွဲ့နှင့် မြန်မာတပ်ဖွဲ့ ခမရ ၅ဝ၂၊ ခမရ ၃၂၄ တို့ ရင်ဆိုင် တိုက်ပွဲဖြစ်ပွားခဲ့ကြရာ မြန်မာအစိုးရတပ်ဖွဲ့မှ တပ်ဖွဲ့ဝင် အနည်းဆုံး ၇ ဦး ထိခိုက် ဒါဏ်ရာရရှိကြောင်း ဒေသခံများ ပြောကြားချက်အရ သိရှိရပါသည်။

တိုင်းရင်းသား ပူးတွဲတပ်ဖွဲ့နှင့် မြန်မာတပ်ဖွဲ့တို့သည် ပန်နျှိူးရွာအဝင် တောစပ်တွင် နံက် ၈း၁၅ နာရီခန့်၌ မိနစ် ၃ဝ ခန့် ပစ်ခတ်ခဲ့ကြပြီး၊ နေ့လယ် ၁၁ နာရီခန့်တွင် ပန်နျှိူးရွာနှင့် ပိန်ပွန်ရွာအကြားရှိ တောင်တန်းတွင်လည်း မိနစ် ၃ဝ ခန့် ပစ်ခတ်မှုများ ဖြစ်ပွားခဲ့ကြသည်။ နေ့လည် ၂း၃ဝ နာရီခန့်တွင် မန်ဆိန်ရွာ အနီးတွင် တနာရီခန့် တိုက်ပွဲဖြစ်ပွားခဲ့သည်။

“ကျနော်တို့ တအာင်း၊ ကချင်၊ ရှမ်း တပ်ဖွဲ့တွေရဲ့ ပူးတွဲစစ်ရေးလှုပ်ရှားမှုအနေနဲ့ ကွတ်ခိုင်ဒေသက ရွာတွေမှာ မူးယစ်ဆေးဝါးတိုက်ဖျက်ဖို့ တရွာဝင်တရွာထွက် လိုက်ပြီး စည်းရုံးဟောပြောတာကို သူတို့ မြန်မာတပ်ဖွဲ့တွေက လိုက်နှောက်ယှက်နေတာဖြစ်တယ်။ ကျနော်တို့ကလည်း တတ်နိုင်သလောက်တော့ ပစ်ခတ်မှုမဖြစ်အောင် ရှောင်ပါတယ်။ ဒါဒီနေ့တော့ ရှောင်လို့မရတဲ့ အခြေအနေကြောင့် တိုက်ပွဲငယ်
သုံးကြိမ်လောက်ဖြစ်သွားရတာပါ” ဟု တအာင်းတပ်မှူးတဦးက ပြောပြသည်။

ပလောင်ပြည်နယ်လွတ်မြောက်ရေးတပ်ဦး P.S.L.F ၏ နိုင်ငံရေး ဦးဆောင်မှုဖြင့်ဖွဲ့စည်းထားသော တအာင်းအမျိုးသား လွတ်မြောက်ရေး တပ်မတော် T.N.L.A အနေဖြင့် တအာင်းဒေသအတွင်း မူးယစ်ဆေးဝါးတိုက်ဖျက်ရေး၊ နယ်မြေစိုးမိုးရေး၊ လူထုစည်းရုံးရေးများ ပိုမိုပြုလုပ်ရန် တပ်ဖွဲ့အသီးသီးကို ညွန်ကြားချက်ထုတ်ကာ လှုပ်ရှားနေလျှက်ရှိသည်။

တအာင်းဒေသ အချို့ဖြစ်သည့် နမ့်ခမ်း၊ ကွတ်ခိုင်နှင့် မန်တုံမြို့နယ်များ တွင် K.I.A ၊ S.S.P.P/S.S.A နှင့် T.N.L.A တပ်ဖွဲ့တို့ ပူးတွဲစစ်ဆင်ရေးတပ်ဖွဲ့များရှိပြီး၊ မြန်မာတပ်ဖွဲ့များနှင့် တိုက်ပွဲငယ်များ မကြာခဏ ဖြစ်ပွားနေလျှက်ရှိသည်။

သတင်းနှင့်ပြန်ကြားရေးဌာန
ပလောင်ပြည်နယ်လွတ်မြောက်ရေးတပ်ဦး - P.S.L.F