အာဆီယံ ဥက္ကဋ္ဌနေရာနှင့် ထိုက်တန်ကြောင်း မြန်မာပြသရန်လို
ဒေါက်တာ ဆူရင် ပစ်ဆူဝမ်နှင့် ဒေါ်အောင်ဆန်းစုကြည်တို့ကို သတင်းစာရှင်းလင်းပွဲတွင် တွေ့ရစဉ် (ဓာတ်ပုံ - ဧရာဝတီ)
မြန်မာအစိုးရ အနေဖြင့် ကြားဖြတ် ရွေးကောက်ပွဲတွင် ပွင့်လင်းမြင်သာမှု၊
တရားမျှတမှု၊ လွတ်လပ်မှုများ ပေးခြင်း အားဖြင့် ၂၀၁၄ ခုနှစ်တွင် တာဝန်ယူခွင့်
ရမည့် အာဆီယံ ဥက္ကဋ္ဌနေရာနှင့် ထိုက်တန်ကြောင်း ပြသရမည်ဟု အာဆီယံ အထွေထွေ အတွင်းရေးမှူးချုပ် ဒေါက်တာ ဆူရင် ပစ်ဆူဝမ်က ပြောဆို လိုက်သည်။
ဖေဖော်ဝါရီလ ၂၀ ရက်နေ့မှစတင်၍ ၄ ရက်ကြာ ခရီးစဉ်အဖြစ် မြန်မာနိုင်ငံသို့
ရောက်ရှိနေသော ဒေါက်တာ ဆူရင် ပစ်ဆူဝမ်သည် ယနေ့နံနက်
ဒေါ်အောင်ဆန်းစုကြည်နှင့် တက္ကသိုလ် ရိပ်သာလမ်းရှိ နေအိမ်တွင် တနာရီကျော်ကြာ
တွေ့ဆုံ ဆွေးနွေးပြီးနောက် သတင်းထောက်များကို အထက်ပါအတိုင်း ပြောဆိုခြင်း
ဖြစ်သည်။
“အာမခံချက် အပြည့်အ၀ ရှိတဲ့ ရွေးကောက်ပွဲ ဖြစ်စေလိုတယ်။ မဲဆွယ် စည်းရုံးရေး
ကာလတွေမှာလည်း ပါတီအားလုံး တန်းတူညီမျှ အခွင့်အရေး ရရှိရမယ်။ နိုင်ငံတကာက
လိုလားနေတဲ့ အာမခံချက်တွေကို မြန်မာအစိုးရ လုပ်ဆောင်ပြရမယ်” ဟု ၎င်းက ဆိုသည်။
မြန်မာအစိုးရ၏ ထိုသို့ လုပ်ဆောင်ပြရေးတွင် လိုအပ်သော အကူအညီများကို အာဆီယံက
ကူညီ ပေးမည်ဖြစ်ကြောင်း ဒေါက်တာ ဆူရင်ပစ်ဆူဝမ်က နေပြည်တော်တွင် အစိုးရ
အဖွဲ့ဝင်များနှင့် တွေ့ဆုံစဉ်ကလည်း ပြောဆိုခဲ့သည်။
မြန်မာနိုင်ငံ၌ ဖြစ်ပေါ်နေသော ပြုပြင် ပြောင်းလဲမှုများနှင့် နိုင်ငံတကာ
အသိုင်းအ၀န်း၏ အမြင်များ၊ အစိုးရအဖွဲ့နှင့် ဒေါ်အောင်ဆန်းစုကြည် အကြား
ပူးပေါင်း ဆောင်ရွက်နိုင်ဖွယ် ကိစ္စရပ်များနှင့် လူထုအားလုံး အကျိုး
သက်ရောက်မှု ခံစား ရရှိ စေနိုင်မည့် လုပ်ဆောင်မှုများ ဆောင်ရွက်နိုင်ရန်
ဒေါ်အောင်ဆန်းစုကြည်နှင့် အဓိက ဆွေးနွေး ခဲ့ကြောင်း ဒေါက်တာ ဆူရင် ပစ်ဆူဝမ်က
ဆိုသည်။
သမ္မတ ဦးသိန်းစိန်နှင့် တွေ့ဆုံစဉ် လာမည့် ကြားဖြတ် ရွေးကောက်ပွဲ၌ အာဆီယံ
အဖွဲ့ချုပ်ရုံးနှင့် အာဆီယံ နိုင်ငံများမှ ကိုယ်စားလှယ်များ လာရောက် လေ့လာ
စောင့်ကြည့်နိုင်ရေး အလေးအနက်ထား စဉ်းစား မည်ဟု ပြောဆိုခဲ့ကြောင်း၊
သို့သော် လာရောက်ခွင့် ပေးမည့် အချိန်ကာလ အတိအကျကို မသိရသေးကြောင်း ဒေါက်တာ
ဆူရင် ပစ်ဆူဝမ်က သတင်းထောက်များကို ပြောသည်။
ဒေါက်တာ ဆူရင် ပစ်ဆူဝမ်က ဒေါ်အောင်ဆန်းစုကြည်အား MYANMAR-ASEAN CHAIR 2014
စာတမ်းပါ တီရှပ်ကို အမှတ်တရ လက်ဆောင် အဖြစ် ပေးအပ်ခဲ့သေးသည်။
Copy from - irrawaddy.org
0 件のコメント:
コメントを投稿