ပြည်တွင်းစစ် ပေတံ
ပြည်တွင်းစစ် အစ
၁၉၄၈ ခုနှစ် ဇန်နဝါရီလ (၄) ရက်နေ့မှာ ဗမာပြည် လွတ်လပ်ရေး ရခဲ့တာ အားလုံး
အသိပင်။ ဗမာပြည်သူတွေရဲ့ ဘဝ သမိုင်းကလည်း အဆိုးဇာတာ ပါခဲ့သလား မသိ။
လွတ်လပ်ရေး အကြောင်း ပြောလို့ မဝသေးခင်မှာပဲ ပြည်တွင်းစစ် အကြောင်း
ပြောကြရတော့တယ်။
လွတ်လပ်ရေးလည်း ရ၊ ပြည်တွင်းစစ်လည်း ဖြစ်ကရောလို့ ဆိုရမှာပါ။
လွတ်လပ်ရေးရပြီး (၂) လကျော်မှာပဲ လက်နက်ကိုင် တော်လှန်ရေးတွေ ဗမာပြည်အနှံ့
ပေါ်လာခဲ့တာပါ။ ၁၉၄၈ ခုနှစ် မတ် လ (၂၈) ရက်နေ့မှာ ဗမာပြည် ကွန်မြူနစ်ပါတီရဲ့
လက်နက်ကိုင် တော်လှန်ရေး၊ ၁၉၄၈ ခုနှစ် သြဂုတ်လ (၉) ရက်နေ့မှာ ကရင်နီ
လက်နက်ကိုင် တော်လှန်ရေး၊ မြန်မာ သက္ကရာဇ် ၁၃၁၀ ခုနှစ် ဝါခေါင် လပြည့်နေ့
(၁၉၄၈ ခုနှစ် သြဂုတ်လ ၁၉ ရက် နေ့) မှာ မွန် လက်နက်ကိုင် တော်လှန်ရေး၊ ၁၉၄၉
ခုနှစ် ဇန်နဝါရီလ (၃၁) ရက်နေ့မှာ ကရင် လက်နက်ကိုင်တော်လှန်ရေး၊ ၁၉၅၈ ခုနှစ်
မေလ (၂၁) ရက်နေ့မှာ သျှမ်း လက်နက်ကိုင်တော်လှန်ရေး၊ ၁၉၆၁ ခုနှစ် ဖေ
ဖေါ်ဝါရီလ (၅) ရက်နေ့မှာ ကချင်လက်နက်ကိုင် တော်လှန်ရေး စတဲ့ ဗမာပြည်
လူမျိုးပေါင်းစုံ ပြည်သူတွေရဲ့ လက်နက်ကိုင် တော်လှန်ရေးတွေ ပေါ်ပေါက်
လာခဲ့ရပါတယ်။
လူမျိုးပေါင်းစုံ ပြည်သူတွေရဲ့ လက်နက်ကိုင် တော်လှန်ရေးတွေနဲ့ ပတ်သက်လို့
ဖောက်ပြန်တဲ့ အစိုးရ အဆက်ဆက်နဲ့ အဲဒီ့ ဘက်က ရပ်တည် ခဲ့ကြတဲ့ သမိုင်း
မှတ်တမ်းတွေ စာတွေမှာ ပြည်တွင်းစစ် စဖြစ်ခဲ့ရတာနဲ့ ပတ်သက်ရင်
လက်နက်စွဲကိုင် သူတွေဟာ အစွန်း ရောက်လို့ ရန်လိုလို့ ပြည်တွင်းစစ်
ဖြစ်ခဲ့ရတယ် စသဖြင့် အမျိုးမျိုး ရေးသားပြောဆိုထားတာတွေ ရှိပါ တယ်။ တဖက်သတ်
ဘယ်လိုပဲ ပြောကြ ရေးကြပါစေ၊ အခု ဖေါ်ပြထားတဲ့ အမှန်တကယ် ဖြစ်ပျက်ခဲ့တဲ့
နေ့စွဲ မှတ်တမ်းတွေကို ကြည့်လိုက်ရင်ပဲ ပြည်တွင်းစစ်ဆိုတာ တရွာလုံးနဲ့ တယောက်ဖြစ်တဲ့ စစ်ပွဲဆိုတာ ရှင်းနေပါတယ်။
ဒါကို နိုင်ငံရေး စကားလုံးနဲ့ ပြောရရင်တော့ ဗမာပြည် ပြည်တွင်းစစ်ဟာ လူမျိုးပေါင်းစုံ ပြည်သူတွေနဲ့ ဖေါက်ပြန်တဲ့ အစိုးရကြားမှာ ဖြစ်တဲ့စစ်၊ အဲသလို ပြောရပါလိမ့်မယ်။
ဘာကြောင့် လက်နက်ကိုင်သလဲ
နေ့စွဲ မှတ်တမ်းတွေကို သာမက တိုင်းရင်းသား ပြည်သူတွေမှာ လက်နက်စွဲကိုင်
တော်လှန်ခဲ့ရတဲ့ အခြေခံ အကြောင်း အရင်းတွေ၊ လတ်တလော အကြောင်းရင်းတွေ
အသီးသီး ရှိကြပါတယ်။ အဲဒီ့အကြောင်း အရင်းတွေထဲမှာ ကရင် လက်နက်ကိုင်
တော်လှန်ရေးနဲ့ ပတ်သက်တဲ့ ပြောဆိုချက်ကို နမူနာ ဖေါ်ပြချင်ပါ တယ်။
၁၉၆၂ ခုနှစ် စစ်အာဏာရှင်တွေ တက်လာပြီးတော့ ၁၉၆၃ ခုနှစ်မှာ ပြည်တွင်း
ငြိမ်းချမ်းရေး ခေါ်ပါတယ်။ အတုအယောင် ပြည်တွင်း ငြိမ်းချမ်းရေးပါ။ ပြည်တွင်း
ငြိမ်းချမ်းရေးအတွက် ဗိုလ်နေဝင်း စစ်အစိုးရနဲ့ တော်လှန်ရေး အင်အားစု
တွေကြား အပြန်အလှန် ပေးစာတွေ ပေးကြပါတယ်။ အဲဒီ့ ပေးစာတွေထဲက KNU ပါတီရဲ့
၁၉၆၃ ခုနှစ် ဇွန်လ (၁၅) ရက်နေ့စွဲနဲ့ တော်လှန်ရေး ကောင်စီ၏ ပြည်တွင်း
ငြိမ်းချမ်းရေး ဆွေးနွေးချက်အပေါ် ပြန်ကြားချက်ဆိုတဲ့ စာ အပိုဒ်(၂) မှာ
အခုလို ရေးသားထားပါတယ်။
“ကေအဲန်ယူ ပါတီသည် ကရင်အမျိုးသားများနှင့်တကွ တိုင်းရင်းသားပေါင်းစုံ
လုပ်သားပြည်သူတရပ်လုံး၏ အကျိုးစီးပွား အတွက် ပြဿနာအဝဝတို့ကို ဒီမိုကရေစီ
နည်းအရ ငြိမ်းချမ်းစွာ ဖြေရှင်းရန် တမတ်တည်း ခံယူ ကျင့်သုံးခဲ့ပါသည်။ ဤခံ
ယူချက် အတိုင်းပင် ၁၉၄၈ ခုနှစ်၊ ဖေဖေါ်ဝါရီလ (၁၁)ရက်နေ့ ကရင် တမျိုးသားလုံး၏
ဆန္ဒပြပွဲကြီးတွင်(၁) ကရင်ပြည် ချက်ခြင်းပေး၊ (၂) ကရင် တကျပ် ဗမာတကျပ်
ချက်ခြင်းပြ၊ (၃) လူမျိုးရေး အဓိကရုဏ်း အလိုမရှိ၊ (၄) ပြည်တွင်းစစ် အ
လိုမရှိ စသည့် တန်းတူရေး၊ ဒီမိုကရေစီရေး၊ လူမျိုးစုံ ချစ်ကြည်ရေးနှင့် ငြိမ်းချမ်းရေး ကြွေးကြော်သံ (၄)ရပ်ကို ကိုင်စွဲ၍ ရိုးသားစွာ ဆန္ဒပြ တောင်းဆိုခဲ့ခြင်း ဖြစ်ပါသည်။သို့သော်လည်း ကရင်အမျိုးသားများ၏ ဤတောင်းဆိုချက် များကို နောက် ဆုံးတွင် ဒီမိုကရေစီ နည်းအရ ငြိမ်းချမ်းစွာ ဖြေရှင်းခွင့် မရတော့ဘဲ၊ အုပ်စိုးသူ အစိုးရများက လက်နက်ဖြင့် အကြမ်းဘက် နှိမ်နင်းလာမှုကြောင့် ပြည်တွင်းစစ် ဖြစ်ပွားပေါ်ပေါက်လာခဲ့ရသည်ကို ပြည်သူလူထုကြီး တရပ်လုံး အသိပင်ဖြစ်ပါသည်။”
အဲဒီ့နမူနာကို ကြည့်ရင်ပဲ ဗမာပြည် ပြည်တွင်းစစ်ဟာ လူမျိုးပေါင်းစုံ
ပြည်သူတွေက ဒီမိုကရေစီနဲ့ အမျိုးသား တန်းတူ ခွင့် တွေဆုံး ရှုံးရတဲ့အတွက်
လက်နက်စွဲကိုင် ခုခံ ကာကွယ် ရတဲ့စစ် ဖြစ်တယ်ဆိုတာ သမိုင်း အဖြစ် အပျက်တွေက
ဖေါ်ပြ နေခဲ့ ပြီး ပါပြီ။
ဖိနှိပ်စစ်
အုပ်စိုးသူ ဘက်က ပြည်တွင်းစစ်ကို ဆင်နွှဲခဲ့တဲ့ အကြောင်းအရင်း၊
အစိုးရအဆက်ဆက် ဒီနေ့အထိ ဆင်နွှဲ နေသေးတဲ့ အ ကြောင်းရင်းကို ပြောရရင်တော့
ခုခံစစ်ရဲ့ ဆန့်ကျင်ဘက် အဓိပ္ပါယ်တွေကို တွေ့ရပါတယ်။ အုပ်စိုးသူတွေဘက်က
ဆင်နွှဲ နေတဲ့ ဗမာပြည် ပြည်တွင်းစစ်ဟာ အုပ်စိုးသူ လူတစု အကျိုးစီးပွားအတွက်
ဒီမိုကရေစီကို ဆန့်ကျင်တဲ့စစ်၊ အမျိုးသား တန်းတူခွင့်ကို ဆန့်ကျင်တဲ့စစ်၊
တိုင်းရင်းသား လူမျိုးတွေကို ဆန့်ကျင်တဲ့စစ်၊ ပြည်သူလူထုကို ဆန့်ကျင်တဲ့စစ်
ဖြစ်နေပါ တယ်။ တနည်း ပြောရရင် လူမျိုးပေါင်းစုံ ဗမာပြည်သူတွေကို
ဖိနှိပ်နေတဲ့ ဖိနှိပ်စစ်။
ပြည်တွင်းစစ်အပေါ် ဘယ်လို သဘောထားသလဲ
တခေတ်တခါက ဗမာပြည် နိုင်ငံရေး ဇာတ်ခုံပေါ် တက်လာတဲ့ အစိုးရ အဆက်ဆက်ကို
တိုင်းတာတဲ့ပေတံတခု ရှိခဲ့ပါ တယ်။ အဲဒါကတော့ တက်လာတဲ့ အစိုးရတရပ်ဟာ
သူ့လက်ထက်မှာ ပြည်တွင်းစစ်ကို ဆက်လက် ဆင်နွှဲမလား၊ မဆင် နွှဲဘူးလားဆိုတဲ့
ပေတံ၊ ပြည်တွင်းစစ် အပေါ် ဘယ်လို သဘောထား သလဲဆိုတဲ့ ပြည်တွင်းစစ် ပေတံပါပဲ။
ပြည်တွင်းစစ်ကို ဆက်လက်ဆင်နွှဲရင် ဖေါက်ပြန်တဲ့ အစိုးရ၊ ပြည်သူ့အကျိုးကို
မကြည့်တဲ့ အစိုးရလို့ သတ်မှတ်ပါတယ်။ စစ်မှန်တဲ့ ပြည်တွင်း
ငြိမ်းချမ်းရေးကို အမှန်တကယ် တည်ဆောက်နိုင်မှသာ ဒီမိုကရေစီ အစိုးရတရပ်ရဲ့
အရည်အသွေးတွေ ရှိလာမှာ ဖြစ်ပါတယ်။
ငြိမ်းချမ်းရေး မရှိဘဲ၊ ဒီမိုကရေစီမရှိနိုင်ပါဘူး၊
ငြိမ်းချမ်းရေးမရှိဘဲ တိုင်းပြည်တည်ဆောက်လို့ မရနိုင်ပါဘူး၊
ငြိမ်းချမ်းရေး မရှိဘဲ စီးပွားရေး ဖွံ့ဖြိုးတိုးတက်မှု မရှိနိုင်ပါဘူး၊
ငြိမ်းချမ်းရေးမရှိဘဲ လွတ်လပ်စွာပညာသင်ကြားခွင့် မရှိနိုင်ပါဘူး။
ငြိမ်းချမ်းရေးမရှိဘဲ လူငယ်တွေအတွက် လှပတဲ့အနာဂတ် မရှိနိုင်ပါဘူး။
ပြည်တွင်းစစ်ရပ်စဲရေးနဲ့ ပြည်တွင်းငြိမ်းချမ်းရေးဆိုတာဟာ
တိုင်းရင်းသားလူမျိုးပေါင်းစုံ ပြည်သူတရပ်လုံးရဲ့ အကျိုးစီး ပွားဆုံချက်၊
တိုင်းပြည်ဖွံ့ဖြိုးတိုးတက်ရေးအတွက် သော့ချက်၊ ဒီမိုကရေစီရေးအတွက် ဗဟိုချက်
ပြဿနာဖြစ်ပါတယ်။
လွှတ်တော်စစ်အစိုးရနဲ့ ပြည်တွင်းစစ်
ဒီနေ့ ဗမာပြည်မှာ အာဏာ ရယူထားတဲ့ လွှတ်တော် စစ်အစိုးရဆိုတာဟာ အရင်စစ်
အစိုးရအတိုင်းပဲလား၊ အပြောင်းအလဲ လုပ်ချင်တဲ့ အစိုးရလား စသဖြင့် ဘယ်လို
အစိုးရမျိုးလဲလို့ အဓိပ္ပါယ် ဖွင့်ဆိုဖို့အတွက် တိုင်းပြည်တွင်းမှာ လက်ရှိ
မြင်တွေ့ ကြားသိနေရတဲ့ အခြေအနေ ပေါင်းစုံနဲ့ အကဲဖြတ် ပြောဆို နေကြပါတယ်။
အဲသလို အခြေအနေတွေနဲ့လည်း အကဲဖြတ် နိုင်ပါတယ်၊ အကဲဖြတ်ကြပါ၊ အဓိပ္ပါယ်
ဖွင့်ကြပါ။
ဒါပေမယ့် ဗမာပြည်သမိုင်း အတွေ့အကြုံတွေအရ အဓိကနဲ့ သာမညကို
ဆုတ်ကိုင်မှုလွဲရင် အကဲဖြတ်ချက် လွဲတတ်ပါ တယ်။ ဒါကြောင့် ဒီနေ့
ဗမာပြည်နိုင်ငံရေးရဲ့ အဓိကပြဿနာဖြစ်တဲ့ ပြည်တွင်းစစ်ကို ဆက်လက်
ဆင်နွှဲနေသလား၊ မဆင်နွှဲတော့ ဘူးလား၊ လက်နက်ကိုင် အင်အားစုတွေ အားလုံးနဲ့
ပြည်တွင်းစစ် ရပ်စဲပြီး စစ်မှန်တဲ့ ငြိမ်းချမ်းရေးကို တည်ဆောက်သလား
မတည်ဆောက်ဘူးလား ဆိုတဲ့ အချက်ကသာ လက်ရှိအစိုးရဟာ စစ်အစိုးရလား၊ ဒီမိုကရေစီ
ဘက်ကို ပြောင်းလဲချင်တဲ့ အစိုးရလား ဆိုတာကို ဖေါ်ပြတဲ့ အဓိကစံ ပေတံတခု
ဖြစ်ကြောင်း တင်ပြ လိုက်ရပါတယ်။ ။
ထွန်းလင်း
(နိုဝင်ဘာလ ၁ ရက်၊ ၂၀၁၁ ခုနှစ်တွင်
မြန်မာနိုင်ငံလုံးဆိုင်ရာကျောင်းသားများဒီမိုကရက်တစ်တပ်ဦး ဖွဲ့စည်းတည်
ထောင်ခြင်း ၂၃ နှစ်မြောက် ထုတ်ဝေသည့် “ဒေါင်းအိုးဝေ” မှ ပြန်လည်
ကူးယူဖေါ်ပြပါသည်။)
Copy from - naytthit.net
0 件のコメント:
コメントを投稿